Grupo GI 1350 - Románicas

No abano de investigacións que ofrece a Filoloxía, o noso Grupo leva a denominación de “Románicas” como unha elección feita a conciencia, xa que esa ‘etiqueta’ lle outorga identidade propia á investigación (e a docencia) que desenvolvemos. O obxectivo principal que perseguimos os membros de Románicas é o de dar a coñecer, desde unha perspectiva comparada, as linguas que derivan do latín e as súas respectivas literaturas como unha “familia” que trascende as fronteiras xeo-políticas. Esta perspectiva de encarar os textos fai posible que se entenda mellor o trasvase de elementos (formais ou conceptuais) dunha área a outra, e que tamén se perciban os percorridos de circulación, adaptación e recepción dos propios textos nuns determinados límites xeográficos.